„Му благодарам за сè на Петар Милошевски, горд сум што го достигнав!“
Пред да каже што било за победата над Малта (2-1), Димитриевски му го посвети овој меч на покојниот Милошевски и му се заблагодари за сè што сторил за македонскиот фудбал.
„Пред сè сакам да се заблагодарам на Петар Милошевски, една легенда во која сум се огледувал, сум се борел да го достигнам. Денеска беше мојот 60. натпревар, исто колку него и затоа фала му за сè, за фудбалот во Македонија, за сè што направил. Горд сум што го постигнав ова, мислам дека тој беше еден од најдобрите голмани во Македонија и дај боже да дојде некој после 10 или 15 години и да ме достигне и мене. Тоа ќе значи дека голманската позиција е одлична за македонската репрезентација“, рече Димитриевски, кој од следниот меч ќе го прземе приматот по број на мечеви.
Победава сигурно ќе му беше послатка ако не примеше гол, но се случи топката несреќно да се стркала во мрежата и Македонија да има неизвесен финиш. Сепак, вели Димитриевски најважна е победата, по сите оние лоши резултати и порази од 2022 година.
„На денешниот натпревар ние излеговме да победиме и тога го остваривме и тоа беше најважно за нас. Нормално, денес нема лесни натпревари, но ние ја достигнавме целта. Притисок немавме. Тие лоши резултати што ги имавме, што губивме, дека не бевме доволно концентрирани. подготвени или не знам што, тоа се само изреки, ние загубивме. Меѓутоа тоа не беше никаков проблем или тешкотија за нас да постигнеме победа денеска. Денеска почнаа нови квалификации, ние излеговме на терен да победиме, така ќе биде и на следните натпревар“, додаде голманот.
.
