МРСАТ МУСТАЌ АКЦИОНЕРИТЕ НА СКОПСКАТА ЦЕМЕНТАРНИЦА УСЈЕ – еве колку милиони евра како дивиденда ќе „ќари“ главниот, Титан Цемент

Акционерите на скопската Цементарница УСЈЕ имаат причини зошто да го
отворат шампањското. Ова особено важи за доминантниот акционер Титан Цемент,
практично фирмата мајка на оваа наша компанија, која поседува дури 95 проценти
од акциите на скопската цементарница.

Практично, компанијата вчера преку Берзата ја извести инвеститорската
јавност дека ќе дели дивиденда, во која ќе влезе и значаен дел од добивката што е реализирана минатата година, како и дел од профитот што бил остварен во 2021
година и бил наменет за реинвестирање, но не се искористил за таа намена.

Или, се на се, Цементарницата УСЈЕ објави дека ќе дели дивиденда во вкупен
износ од 11,67 милиони евра, што практично значи бруто износ на дивиденда од
1.273 денари по акција.

Компанијата лани, како што е познато, оствари добивка од 16,74 милиони
евра, што, за волја на вистината, е за 13 отсто пониска во споредба со
профитот кој успеа да го реализира во 2021 година, на износ од 19,15 милиони
евра. Но, мора да се има предвид дека овој профит од близу 17 милиони евра за
УСЈЕ е одличен резултат, ако се има предвид дека 2022 година беше кризна
година, со огромни цени на енергенсите и висока инфлација, како и намалување на
јавните градежни инвестиции порадуи руско-украинскиот конфликт, што ја намали и
продажбата на компанијата. Сепак, оттаму во своите извештаи објаснуваат дека
успеале да ја задржат профитабилноста, што всушност го покажува и солидната
добивка.

Од вкупно 16,7 милиони евра добивка остварена лани, Собранието на акционери
на УСЈЕ одлучило дека како дивиденда ќе се распределат 10,24 милиони евра.
Додека, пак, ќе се реинвестира останатиот дел од добивката на сума од 6,5
милиони евра. Покрај ланската добивка, за дивиденда ќе се искористи и дел од добивка од
2021 година, која требало да се реинвестира, но не се искористило за таа цел,
па така сега се додаваат уште 1,43 милиони евра неискористена реинвестирана
добивка од претходната година.

Или прецизно, УСЈЕ ќе дели дивиденда од вкупно 11,67 милиони евра. Тоа
значи дека за секоја акција акционерите на таа компанија ќе добијат по 1.273
денари.

Ако се има предвид дека доминантен акционер на УСЈЕ е Титан Цемент
Холандија, кој поседува дури 95 отсто од акциите на нашата цементарница, или
прецизно 535.596 акции, тоа значи дека овој странски акционер годинава ќе
„ќари“ во форма на дивиденда одлична сума од 11,1 милиони евра. Практично,
толку добива странскиот акционер од работењето во нашата држава.

Но, да видиме каде ќе завршат оние 5 отсто од дивидендата што ќе се дели,
или сума од 580 илјади евра, кои нема да му припаднат на Титан Цемент.

Имено, акционери на УСЈЕ се и 238 македонски граѓани, односно домашни
физички лица, кои располагаат со 26.638 акции, или 4,72 отсто од акционерскиот
капитал на компанијата. Однодно, овие 238 домашни акционери ќе земат вкупно 551
илјади евра.

Има и 4 домашни фирми, или правни лица, кои се акционери на УСЈ, и
поседуваат 1.530 акции, кои ќе им донесат 32 илјади евра вкупно.

И три странски физички лица имаат акции во скопската цементарница, но
нивниот финансиски бенефит е многу мал бидејќи имаат само малку акции.

Од компанијата известуваат и дека исплатата на дивидендата ќе се изврши
најдоцна до 30 септември годинава. Последен ден на тргување со право на дивиденда за 2022 година е 30 мај
годинава, додека последен ден на тргување без право на дивиденда за 2022 година
е 31 мај оваа година.  Датум на евиденција според кој се
определува листата на акционери кои имаат право да добијат дивиденда, е први
јуни оваа година.

Н.Н.Ф.