Може не е голема ама е редовна! Каква „инфузија“ ќе примат акционерите на „Македонијатурист“?
Околу 80.000 евра се наменети за идните пензионери кои се членови и на задолжителниот пензиски фонд сокој управува „Сава пензиски фонд“ кој пак за да ги оплоди нивните вложувања инвестирал во акции на најголемата хотелиерска компанија
Најголемата македонска хотелиерска компанија ќе издвои 860.000 евра дивиденда (бруто) за своите акционери. Ова е предлог одлука за која ќе гласаат акционерите на оваа компанија на 19 април годинава.
Важна информација за малите домашни акционери – физички лица е таа дека нето дивидендата по акција ќе изнесува 117 денари (речиси 2 евра по акција) што е сличен износ и на дивидендата што беше исплатена лани за работењето во 2021 година.
Од вкупниот износ што е предвиден за исплата на дивиденда од ланската добивка се издвоени 276.400 евра, а уште 583.250 евра се од добивки од претходни години кои биле акумулирани и расположливи за поделба на дивиденда.
Најголемата хотелиерска компанија во Скопје поседува шест хотели, а четири од нив работат. Лани во март започна да работи целосно реновираниот хотел со 5 ѕвезди „Холидеј Инн“ во чие комплетно реновирање компанијата вложи 4,1 милиони евра. Во функција во април лани беше пуштен и „Хотел Карпош“ кој не работеше заради кратење на трошоци заради ковид рестрикциите.
Во функција се уште хотелите „Бест Вестерн“ во центарот на Скопје и „Белви“ во непосредна близина на автопатот Скопје – Куманово.
Најголеми акционери во „Македонијатурист“ се нејзиниот долгогодишен директор ипретседател на Управен одбор Доне Таневски кој поседува 19,6 отсто од акциите и Соња Бибановска, член на Управниот одбор со 11,3 отсто од акциите.
„Македонијатурист“ меѓу македонските компании важи за еден од најголемите и најуспешни инвеститори во финансиски инструменти. Од нејзините вложувања во депозити и во хартии од вредност од камати и дивиденди остварила финансиски приходи вредни речиси 1 милион евра.
Р.Ф.
