Мистериозен балон над САД: Војската испрати авиони да го истражат
САД следат балон на голема височина кој лета над западниот дел на земјата, изјавија американски официјални лица за CBS News.
Воените авиони го забележале балонот и утврдиле дека не претставува закана, но неговото потекло и намена се уште не се познати, соопштија официјални лица, пренесува nova.rs.
Извори запознаени со предметот, кои сакаа да останат анонимни, изјавија дека балонот летал на исток, а претходно истиот ден официјален претставник изјави дека балонот бил над Колорадо.
Неговото присуство предизвика доволно загриженост што војската испрати авиони за истрага.
Оваа ситуација доаѓа една година откако тензиите меѓу САД и Кина се зголемија кога кинески балон со софистицирана шпионска опрема леташе над континенталниот дел на САД неколку дена.
Кинеското Министерство за надворешни работи тврди дека балонот бил наменет за собирање податоци за времето и дека „отстапил од планираниот курс поради силните ветрови“. Американската војска на крајот го собори крај брегот на Јужна Каролина на 4 февруари 2023 година и ги извлече остатоците.
