Миноски на 4TV.mk: Потребни се сеопфатни анализи за минималната плата и итни реформи во деловната клима
Поранешниот министер за финансии Кирил Миноски гостуваше во емисијата „Ноќно студио“ на 4TV.mk, каде што говореше за економските предизвици со кои се соочуваат компаниите, зголемувањето на минималната плата на 600 евра, ликвидноста на фирмите и потребата од подобрување на деловната клима.
Осврнувајќи се на реакциите во јавноста дека дел од малите бизниси би можеле да стават „клуч на врата“ доколку се реализира зголемувањето на минималната плата, Миноски истакна дека прашањето бара темелна анализа.
„Доколку се анализира структурата на кредитите, ќе се види дека 30–40% од кредитите на компаниите се краткорочни, што укажува на сериозни проблеми со ликвидноста“, посочи тој. Според него, ова е индикатор дека значителен дел од фирмите работат под финансиски притисок.
Тој нагласи дека одлуките за вакви чувствителни прашања треба да се носат врз основа на сеопфатни анализи и соодветни методологии, со цел да се земат предвид сите засегнати страни и ефектите врз економијата.
Миноски предупреди дека еден од акутните проблеми во македонската економија е културата на неплаќање и меѓусебното долговање меѓу компаниите. Како пример наведе искуство на домашен бизнисмен кој го проширува своето работење во Косово, Албанија и Србија, каде што, како што вели, наплатата од деловните партнери се одвива редовно и без поголеми застои.
„Кај нас има случаи каде наплатата доцни и по две, три или четири години, што создава огромна неизвесност и дополнителни трошоци за фирмите“, истакна Миноски. Тој додаде дека постојат и примери на судски спорови во кои компаниите не успеваат да ги наплатат своите побарувања, што дополнително ја нарушува довербата во системот.
Според него, решението лежи и во подобрување на деловната култура, но и во институционални механизми што ќе овозможат поголема сигурност во деловните односи.
Како можни решенија ги посочи:
Овие реформи, како што нагласи, се клучен дел од подобрувањето на бизнис-климата и создавање предвидлив деловен амбиент.
Миноски оцени дека поволниот деловен амбиент е предуслов за инвестиции и економски раст. Доколку претприемачите немаат сигурност дека ќе можат да ги наплатат своите производи и услуги, тие ќе се воздржуваат од инвестирање или ќе ги пренасочуваат средствата надвор од државата.
„Двигател на економијата се луѓето кои преземаат ризик, инвестираат и вработуваат. Државата треба да го поттикнува претприемачкото однесување“, потенцираше тој.
Во однос на воведувањето на е-фактурата, Миноски оцени дека станува збор за позитивен чекор во рамки на пошироката дигитализација на економијата. Според него, проектот требало да биде имплементиран уште порано.
Е-фактурата, како што посочи, може да помогне во спречување на злоупотреби како фиктивно фактурирање и даночни пирамиди, особено во делот на поврат на ДДВ. Дополнително, дигиталниот систем ќе овозможи поголема транспарентност и полесно следење на трансакциите, што би придонело за пофер и поефикасно деловно окружување.
Со оглед на предизвиците со кои се соочува економијата, Миноски заклучи дека се неопходни системски реформи и внимателно креирање политики што ќе обезбедат стабилност, предвидливост и доверба во институциите.
