Министерството за здравство: Итни проверки по тврдењата за непотребни интервенции
Министерството за здравство реагираше на тврдењата што се појавија во јавноста за наводни непотребни медицински интервенции, нагласувајќи дека здравствениот систем функционира врз јасно утврдени професионални стандарди, протоколи и законски постапки. Од институцијата појаснуваат дека одлуките за лекување се засноваат на клинички индикации, а пациентите секогаш имаат право да побараат второ стручно мислење.
„Пациентите треба да се чувствуваат охрабрени да поставуваат прашања, да бараат појаснувања и доколку имаат дилема, да побараат второ мислење – тоа е дел од добрата медицинска практика,“ стои во ставот на Министерството.
Според ресорот, безбедноста на пациентите, медицинската етика и медицината заснована на докази се основните принципи врз кои се гради системот, а истите ќе бидат во фокус и со новиот пристап во раководењето на здравството.
Министерството информира дека веќе се координираат активности за проверка на изнесените тврдења и дека ќе бидат спроведени итни и вонредни надзори за добивање на целосна слика. Дополнително, министерот Азир Алиу најавил дека дигитализацијата на здравствениот сектор, преку системот „Мој Термин“, ќе овозможи подобра двонасочна размена на информации меѓу јавните и приватните здравствени установи, што ќе придонесе и за откривање на евентуални злоупотреби.
„Здравствениот систем се заснова на доверба и затоа секоја јавна комуникација треба да биде одмерена и заснована на проверливи информации, без шпекулации и сензационализам,“ потенцира Министерството, додавајќи дека секој има право на свое мислење, но предупредува дека генерализациите и сензационалистичките изјави можат да нанесат штета врз довербата во системот.
