Министерството за култура со 300.000 денари за концерт на Цветанка Ласкова
Министерството за култура објави резултати за финансирање од прифатените проекти од национален интерес во културата за 2023 година.
Меѓу проектите во областа на музиката и музичко-сценската дејност одобрен е и „50 години јубилеј- Цветанка Ласкова“ односно концерт на фолк пејачката Цветанка Ласкова, која иако со години не е присутна на естрадата, сепак во минатото беше актуелна на фолк сцената.
Станува збор за сума од 300.000 денари или околу пет илјади евра.
Инаку, Ласкова влезе во политиката и беше на чело на Форумот на жени на СДСМ, како и советничка за култура на поранешниот премиер Зоран Заев.
Пред неколку години, додека беше советничка на Заев, се најде и сред скандал откако се објави вест дека нејзината снаа за проект добила грант од над 300 илјади евра од страна на Фондот за иновации и технолошки развој, додека пак фирмата била формирана само еден месец.
Тогаш Обвинителство за гонење организиран криминал и корупција по допрен глас оформи предмет за евентуалните злоупотреби при доделувањето грантови од страна на Фондот за иновации и технолошки развој, а Ласкова беше разрешена од функцијата во Форумот на жени во 2019 година.
