Министерот за Економија Бектеши ја посети македонската компанија АТС ГРУП на водечкиот европски саем за безбедност во Париз – Милипол 2023
На саемот во Париз, Милипол 2023 единствената македонска компанија АТС Груп беше домаќин на Министерот за економија г-дин Бектеши и заменик министерот за внатрешни работи г-дин Буши. Министрите ги пречека сопственикот на групацијата г-дин Демировски заедно со неговиот тим.
„Големо задоволство е со заменик министерот г-дин Буши и со сопственикот на групацијата АТС г-дин Демировски да присуствуваме денес на овој многу значаен саем на наменското производство, односно саем за производи кои важни се за одбраната и безбедноста. Само што имавме прилика да направиме обиколка на саемот и веднаш забележавме дека од регионот АТС е единствена компанија што ја претставува нашата држава со толку голем изложбен простор, тоа покажува дека и во Северна Македонија имаме успешни компании кои не се само што генерираат нови работни места, туку и во делот на иновациите прават одлична реклама за државата. Компании како АТС треба целосно да бидат поддржани од државата за да можат да се развиваат, а нивните идеи и искуство да бидат применети во засилување на капацитетите во државата во производство на производи за потребите на нашата полиција и нашата одбрана како дел од НАТО алијансата.“ – изјави министерот за економија г-дин Бектеши.
АТС ГРУП со седиште во Скопје e модерна македонска корпорација составена од три компании, од кои две во Скопје и една во Самоков со повеќе од 500 вработени и 40 годишно искуство. Истите работат по највисоки стандарди и произведуваат широк асортиман на квалитетни производи познати во светски рамки, и за кои компанијата имаат добиено бројни награди и признанија. АТС Груп се занимава со производство на композитни производи и производи наменети за опремување на армијата и полицијата во делот на балистичка заштита и балистичка безбедност.
Покрај тоа, компанијата произведува и малокалибарска муниција и целосни линии на машини за производство на муниција, со што од година во година постојано го зголемува својот извозен потенцијал и со тоа ги остварува развојниот план и својата мисија.
