МИНИСТЕРОТ НИКОЛОСКИ ЗА КРЕДИТОТ ОД УНГАРИЈА: Тоа се најдобрите услови што можат да се добијат, три години нема да враќаме ништо

Вицепремиерот и министерот за транспорт Александар Николоски, во врска со кредитот од 500 милиони евра кој го најави премиерот Христијан Мицкоски од Унгарија вчера од Вашингтон, вели дека станува збор за најдобрите услови кои што можат да се добијат. Тој вели дека граѓаните треба да размислат дали било кој може вакви услови да добие од било која банка.

„Позајмицата е во износ од 500 милиони евра  и тоа е голема сума, имаме три години грејс период што значи во тие три години не враќаме ништо. Вкупен рок за отплата се 15 години и каматата е само 3,25 отсто, што е историски најниска камата“, рече Николоски во разговор за емисија на Алфа телевизија.

Тој смета дека уште поважно е тоа што со Унгарија ќе се воспостави стратешко економска соработка што ќе значи дека Македонија ќе има можност во годините коишто доаѓаат преку оваа соработка да искористи и други средства.