Минатата година декември бил натпросечно топол и потпросечно врнежлив
Декември 2025 година се вбројува меѓу потоплите и посуви зимски месеци во Македонија, покажуваат официјалните мерења и анализи на Управата за хидрометеоролошки работи. Податоците укажуваат на значајни отстапувања од долгорочните климатски просеци, особено во делот на врнежите.
Во споредба со просечните средномесечни температури за декември во референтниот период 1991–2020 година, минатиот декември бил потопол за 1,3 степени Целзиусови на ниво на држава. Истовремено, количината на врнежи била значително пониска од вообичаената, при што месечната сума изнесувала околу 50 проценти од просекот, кој за овој период изнесува 65 милиметри.
Според карактеризацијата на УХМР, декември 2025 година во поголемиот дел од земјата се оценува како нормално до топол месец, со исклучок на Маврово, каде што температурите биле значително над просекот за овој дел од годината. Во југоисточниот дел од државата врнежите биле околу просечните вредности, додека во западниот и централниот регион месецот бил сушен, а во Крива Паланка и Охрид многу сушен.
Средномесечните температури се движеле од 1,8 степени Целзиусови во Маврово до 6,9 степени во Гевгелија. Највисоката измерена максимална температура во текот на месецот изнесувала 16,7 степени и е регистрирана на 11 декември во Гевгелија. Најниската минимална температура е измерена на 31 декември во Маврово, кога живата во термометарот се спуштила до -11,5 степени.
Што се однесува до врнежите, месечните количини во државата значително варирале – од само 10 милиметри во Охрид до 101 милиметар во Гевгелија. Врнежите биле во форма на дожд и снег, а најголемото дневно количество од 36 милиметри е измерено на 25 декември во Гевгелија. Највисоката дневна снежна покривка, од 16 сантиметри, е регистрирана на 8 декември во Маврово.
Анализите на метеоролошките податоци укажуваат дека и почетокот на зимата 2025/2026 година се одвивал со изразени температурни и врнежни отстапувања, што дополнително го потврдува трендот на почести климатски варијации во земјава.
