Милошоски: Во Македонија постои реално оправдана разочараност од односот на ЕУ
Во Македонија постои оправдана разочараност од односот на Европската унија (ЕУ) во поглед на процесот на интегрирање, оценува пратеникот од ВМРО-ДПМНЕ и поранешен министер за надворешни работи, Антонио Милошоски. Тој истакна дека иако процесот на преговори е важен, многу повеќе значајни се крајот и целта на тој процес, односно, што ќе се случи по започнувањето на преговорите.
„Превземената обврска на претходната влада, доколку има можност да се менаџира, би било рационално истата да се менаџира со предвидливост на патот до конечната цел а тоа се европските интеграции. Во Македонија постои реално оправдана разочараност од односот на ЕУ. Веќе еднаш имавме уставни измени за името, и лошите искуства се доволно силни аргументи, Македонија со право да побара одредена извесност за патот кон ЕУ, бидејќи гледаме дека ЕУ не говори со еден глас. Нема сериозна визија за Западниот Балкан и времетраењето на зачленувањето и проширувањето на овие земји”, изјави Милошоски.
Тој нагласи дека за Македонија би било наивно да прави нови уставни измени за да се соочи со уште едно неисполнето ветување. Според него, земјата веќе неколкупати е подложена на ветувања од страна на ЕУ, кои не биле исполнети, а самите уставни измени не ја приближиле Македонија до почеток на преговорите за членство.
„Сметам дека одложеното дејство е рационален аргумент кој би можел да биде поттик за Македонија да се интегрира, Бугарија да не блокира а ЕУ да го менаџира тој процес до конечната цел“, додаде Милошоски.
Во однос на проширувањето на ЕУ, Милошоски истакна дека во последните десет години не постоела сериозна визија за проширување и дека тоа станало фраза која често се повторува, без реални геополитички одлуки што би воделе до проширување на Унијата со земјите од Западен Балкан.
Како пример, тој се потсети на изјавата на еврокомесарката за проширување Марта Кос, која не ја спомена можноста за полноправни членки од Западен Балкан во ЕУ. Милошоски ја оцени оваа изјава како индикатор дека во самата ЕУ нема консензус за тоа дали, кога и до кое ниво ќе се случи следното проширување на Унијата.
