Милошоски: Нема да се градат бегалски кампови во Македонија
Пратеникот од ВМРО-ДПМНЕ и член на партискиот Извршен одбор, Антонијо Милошоски, денеска категорично ги отфрли информациите дека Македонија би можела да стане дестинација за сместување азиланти од Велика Британија. Според него, ваквите наводи од британските медиуми не стојат и претставуваат обид за политички спинови.
Милошоски посочи дека новиот Договор за стратешко партнерство меѓу двете држави не содржи никакви одредби поврзани со изградба на бегалски кампови, туку напротив – нуди рамка за унапредена соработка во клучни области како инвестиции, инфраструктура, безбедносни политики и економија.
„Договорот е сериозен и значаен за Македонија. Со него се предвидува поддршка за изградба на железничка, патна, здравствена и енергетска инфраструктура. Но бегалски кампови не се дел од ниту една точка,“ изјави Милошоски. Тој нагласи дека Велика Британија, по излегувањето од ЕУ, склучува слични договори со земјите од регионот со цел зајакнување на легалната основа за борба против организирана и нелегална миграција – што, според него, е во компатибилност со постојната соработка со Фронтекс.
Како најсилен демант за медиумските пишувања, Милошоски ја цитираше и изјавата на британскиот амбасадор во Скопје, кој потврдил дека договорот се однесува на развој во инфраструктурата, економијата, безбедноста и образованието, но не и на сместување азиланти.
Тој оцени дека политичките актери кои продолжуваат да ја отвораат темата за бегалски кампови го прават тоа од недостаток на визија и идеи за унапредување на меѓународните партнерства.
Во меѓувреме, британски медиуми објавија дека Велика Британија наводно разгледува можност за депортирање одбиени азиланти во Северна Македонија и дека разговори на оваа тема се одвивале од есента. Македонските власти ваквите наводи решително ги негираат.
