Миле Бошњаковски, шеф на кабинетот на претседателот во претприемачки води: Ќе „произведува“ нов алкохолен бренд во Македонија
Семеен бизнис поврзан со Миле Бошњаковски, генерален секретар и шеф на кабинетот на претседателот Стево Пендаровски, ќе пушти во продажба нов алкохолен бренд кој се произведува во неговото место на потекло – Галичник.
Во текот на изминатото лето семејниот бизнис на поранешниот портпарол на Владата регистрираше две подружници – една дестилерија за алкохол во Галичник, и уште една за дистрибуција на алхолни пијалоци. За краток период семејната дестилерија на Бошњаковски го брендираше првиот производ
Сувиот џин White Ridge е првиот производ на дестилеријата „Галичник Спирит Лаб“ и замислено е да се најде на европскиот пазар како пијалок со традиционални карактеристики. Неговото рекламирање веќе е започнато на големо на социјалните мрежи, каде се најавува почетокот на продажбата.
„Дестилеријата Galichnik Spirit Lab е семеен бизнис, со две локации. Едната е во срцето на Галичник, каде се дестилираат специјалните изданија на пијалоците, а втората локација е во Скопје, каде што се наоѓа главниот магацин“, пишува на сајтот на бизнисот кој го води сопругата на Бошњаковски – Билјана Бошњаковска.
„Галичник Спирит Лаб“ под водство на Бошњаковска во текот на летото прво ја регистрираше детсилеријата како подружница, а потоа и продажната мрежа, односно магацинот, со што го најави своето производство. Компанијата најавува и други содржини за клиентите-туристи на планината Бистра од следната година.
Превземено од whiteridgegin.com
Инаку Бошњаковски во текот на 2017 беше именуван за прв портпарол на Владата при промената на власта во 2017, а потоа по победата на Пендаровски на претседателските избори, во 2019 тој беше назначен за прв човек на неговиот кабинет.
Треба да се каже и дека Министерството за земјоделство во мај објави повик за финансиска поддршка на мали семејни дестилерии од програмата за финансирање микроземјоделски производители на вино и алкохолни пијалаци како нова мерка за поддршка, која првпат почнува со реализација од оваа година. Како што беше објавено тогаш, субвенционирањето ќе се прави со цел зголемување на конкурентноста, како и развој на семејни бизниси од областа на производство на жестоки алкохолни пијалаци.
А.К.
