Милановиќ вели Пленковиќ бил човек кој забива ножеви во грб
Претседателот на Хрватска, Зоран Милановиќ го критикуваше премиерот Андреј Пленковиќ.
Тие си разменија остри зборови по најновите шпекулации објавени во шведските медиуми дека Пленковиќ ќе се кандидира за нов генерален секретар на НАТО.
Милановиќ порача дека е важно датумот за парламентарните избори да не се приспособува на амбициите и интересите на Пленковиќ и на неговите амбиции да стане потенцијален кандидат за нов генерален секретар на НАТО.
„Инаку, во време на криза шефот на НАТО е само медиумски присутен, но тој мора да биде допадлив за Вашингтон и Париз“, рече Милановиќ.
Вели дека Пленковиќ им забивал ножеви во грб на луѓето кои му помагале.
Пленковиќ му одговори на шефот на државата.
„Ми се чини дека шведските медиуми се збуниле, мислеле на Милановиќ, бидејќи тој силно ја поддржа Шведска во однос на влезот во НАТО. Тој застапува многу јасни прозападни, трансатлантски позиции и одвај го чекаат во седиштето на НАТО“, прокоментира Пленковиќ.
За најсериозен кандидат за нов генерален секретар на НАТО, на местото на Јенс Столтенберг, кому мандатот му истекува на 30 септември, се смета естонската премиерка Каја Калас. Кој ќе го наследи Столтенберг ќе се знае во јули. Инаку, Милановиќ го напаѓаше Пленковиќ за поддршката за Украина, а тој му врати дека е човек на рускиот претседател Владимир Путин.
foto EPA-EFE/ANTONIO BAT
