Милановиќ бара Србија да воведе санкции за Русија ако сака влез во ЕУ

Хрватскиот претседател Зоран Милановиќ вели дека ако Србија сака да биде дел од Европската Унија(ЕУ) мора да воведе санкции за Русија. Тој му порача на Белград дека војната во Украина трае повеќе од една година, а тие сè уште не се изјасниле „каде се“.

„Србија ако сака во Европската Унија мора да го прекине овој вид односи со Русија, мора. Мора да воведе санкции“, изјави хрватскиот претседател.

Милановиќ додаде дека него го сметаат за русофил, но дека премиерот Андреј Пленковиќ „најнормално се сретнува и кова некакви големи, но доста нејасни планови со луѓето кои се руска платформа во Европа“. Вака ја коментираше средбата на Пленковиќ со српската премиерка Ана Брнабиќ во Бански двори во неделата.

„Брнабиќ е портпаролка, таа е курир на господинот (Александар) Вучиќ. Нормално, јас тоа не го потценувам, но треба да се знае кој игра каква улога“, кажа Милановиќ. 

Тој ја ја повика Србија како што кажа „да престане да тропа за етничкото чистење во Хрватска“. Брнабиќ во неделата учествуваше на собранието на Српскиот народен совет во загрепската сала Ватрослав Лисински.

Хрватскиот претседател вели дека Српскиот народен совет „не ги претставува Србите во Хрватска“, тоа е „измама и не е репрезентативна установа“. 

Инаку, неодамна тој изјави дека Србија е во шизофрена ситуација затоа што вели дека влегува во ЕУ, а не воведува санкции за Русија. 

Дури и европратеници побараа да се направи ревизија и да се види колку пари доделуваат на Србија, земја која рекоа дека поддржува антидемократски режими. 

Инаку, Милановиќ го нарекуваа и „човек на рускиот претседател Владимир Путин“, затоа што беше против тоа украински војници да се обучуваат во Хрватска. 

фото ЕПА