Милан нема да регистрира истополови двојки како родители
Италијанскиот град Милан престана да ги запишува изводите од странство во матичната книга на родените, во кои двајцата членови на истополови парови се именувани како родители на детето, јави АНСА.
Одлуката беше донесена откако префектот на Милано издаде окружно писмо за оваа практика врз основа на консултации со Министерството за внатрешни работи.
За овој потег, канцеларијата на префектот се повика на законот за медицински потпомогната репродукција, кој во Италија е дозволен само за хетеросексуални парови. Овој закон го прогласува и сурогат мајчинството за нелегално.
Одлуката повторно ја разгорува дебатата за конзервативната агенда на десничарската влада на италијанскиот премиер Џорџија Мелони, која дојде на власт како бранител на традиционалните христијански вредности и се спротивставува на родовата идеологија и лобирањето за ЛГБТ заедницата, забележува Ројтерс.
Италија ги легализираше истополовите граѓански заедници во 2016 година. Сепак, не им е дозволено да посвојуваат деца. Во отсуство на јасна легислатива за ова прашање, некои судови пресудиле во корист на истополовите парови да си ги посвојуваат децата, а градоначалниците на некои градови како Милано регистрирале сурогат раѓања за истополови парови.
Градоначалникот на Милано, Џузепе Сала, кој е левиот центар, рече дека ќе се придржува на наредбата на префектот, но дека ќе продолжи да се бори политички и двајцата членови на истополови двојки да бидат признати како родители на детето.
Постапките на владата беа критикувани од активисти на ЛГБТК+ заедницата.
