Михаилов на принуден „одмор“ по пет дена борба со пожарите
По пет дена непрекината борба со пожарите во југоисточна Македонија, директорот на Национални шуми, Кире Михаилов, е хоспитализиран поради здравствени компликации предизвикани од исцрпеност. Веста ја објави самиот Михаилов на социјалните мрежи, каде упати емотивна порака до јавноста.
„ЕКИПО, поради тоа што сум хоспитализиран, одам на присилна пауза додека кажат докторите. И така, веќе една година откако сум назначен за директор, немам користено одмор, па штом не знам редовно – еве тогаш присилно“, напиша Михаилов.
Во истата објава, тој сподели и драматична случка од терен, во која лично помогнал при спасување на младо момче по име Славе, кое се нашло во животна опасност при гасење на пожарот.
„Среќен сум што Славе го извлеков од огнот и е овде на сигурно до мене, а беше паднат на линијата на огнот од вдишување чад, бранејќи ја викендицата на чичко му“, вели Михаилов. Тој изрази надеж и за неговите блиски, кои останале заглавени на терен, опколени од сите страни од пламените јазици.
Михаилов упати голема благодарност до припадниците на МВР, специјалната единица и пилотите на хеликоптерите, кои со, како што рече, „прецизни фрлања“ успеале да спречат огнот да стигне до нив. Посебен поклон упати до командирот на СВР Струмица, Никола, кој заедно со своите луѓе, направил „буквално невозможното“.
И покрај личните здравствени проблеми, Михаилов рече дека не жали што е во болница, туку жали што огнот, по пет дена надчовечка борба, успеал да навлезе на територијата на општина Радовиш.
„За кратко се гледаме повторно онаму каде што ќе бидам најпотребен – рамо до рамо со нашите сограѓани, во добро и зло. Да сте ми живи, здрави и среќни сите, а нашата Македонија да ни биде вечна!“, заврши Михаилов.
