Мицкоски: За минималната плата мора да се постапува исклучиво според законските одредби

Владата останува на ставот дека ќе го поддржи и примени секој договор за зголемување на платите што ќе произлезе од дијалогот помеѓу работниците и работодавачите.

Премиерот Христијан Мицкоски денеска преку социјалните мрежи упати порака дека извршната власт е подготвена за реализација на повисоки примања, но нагласи дека во делот на минималната плата мора да се постапува исклучиво според законските одредби.

Според премиерот, понудата за зголемување на платите на административните службеници за околу 40 проценти сè уште е „на маса“. Тој потсети дека ова покачување, планирано во периодот од март 2026 до март 2028 година, претходно беше одбиено од страна на Сојузот на синдикати на Македонија (ССМ). Услов за реализација на оваа понуда е изнаоѓање заедничка формулација за еден колективен договор.

„Првиот момент кога работниците и работодавачите ќе се договорат, ние како странка тоа ќе го поддржиме и ќе го примениме“, истакна Мицкоски, додавајќи дека по решавањето на овој спор, огромното мнозинство од администрацијата ќе има регулиран однос со државата како работодавач.

Во однос на минималната плата, премиерот најави дека ќе има соодветно зголемување и нивелирање, но во рамки на предвидените законски процедури.