Мицкоски: Уставни измени нема да има додека сум премиер, бараме гаранции за македонскиот идентитет
Премиерот Христијан Мицкоски денеска јасно го соопшти ставот на Владата по прашањето за уставните измени. Според него, додека тој е на чело на Владата, нема да се разгледуваат уставни промени.
„Уставни измени нема да има, додека сум јас претседател на Владата“, рече Мицкоски, истакнувајќи дека за да се размислува за вакви промени, треба да бидат исполнети минимум два услови.
Првиот услов се однесува на македонската заедница во Бугарија, која според премиерот треба да ги добие загарантираните права во согласност со меѓународното право и релевантните конвенции и резолуции за човекови права.
„Вториот услов е да добиеме гаранции за нашиот македонски идентитет и јазик. Не смее да има нови билатерални вета, нови омаловажувања или опструкции, особено за држава која покажала и докажала дека сака да биде дел од европското семејство и која за својот народ и граѓани понела големи жртви“, додаде Мицкоски.
Премиерот подвлече дека Македонија не смее повторно да се соочи со понижувања или блокади од било кој, од субјективни причини, и дека за Владата прашањата на идентитетот и правата на македонската заедница се неприкосновени.
