Мицкоски: Прво ќе има тендер за трет мобилен оператор
Премиерот Христијан Мицкоски денеска појасни дека потпишаниот меморандум со унгарскиот 4iG е необврзувачки и дека прво ќе се распише тендер за влез на трет голем мобилен оператор во земјата, кој подоцна преку зголемување на конкуренцијата би ја намалил цената на услугите.
„Тендер мора да има, но тој меморандум е необврзувачки, со којшто компанијата 4iG изразува интерес, пројавува интерес дека е заинтересирана да се појави на тој тендер, иначе таман работа сигурно не може тоа да биде дадено во четири очи, нормално и други доколку има компании кои што се заинтересирани и доколку сакаат да потпишат ваков необврзувачки меморандум, тоа ќе биде потпишано“, изјави претседателот на Владата Христијан Мицкоски одговарајќи на новинарско прашање.
Премиерот Мицкоски објасни дека тендерот ќе биде распишан според законските прописи во периодот што следи.
„Сега моментално компаниите коишто се заинтересирани, можеби ќе има и други коишто ќе потпишат ваков меморандум, го анализираат пазарот и периодот којшто следи, наш интерес и интересот на граѓаните, а кој е интересот на граѓаните, поголема конкуренција и пониски цени. Интересот на граѓаните е и наш интерес како Влада“, истакна претседателот на владата.
