Мицкоски предлага вонреден електронски попис во 2026 – условува со една изборна единица
Премиерот Христијан Мицкоски денеска на собраниската седница за пратенички прашања излезе со предлог идната година да се спроведе вонреден електронски попис, но го услови тоа со усвојување на модел со една изборна единица „веднаш“.
Овој предлог уследи како одговор на пратеничкото прашање од Халил Снопче од Алијансата за Албанците, кој побара Владата да ја поништи одлуката за намалување на бројот на советници во општините, со оглед дека Уставниот суд вчера укина делови од методологијата за пописот од 2021 година.
– Уставниот суд оцени дека директорот на Заводот за статистика ги пречекорил надлежностите со тоа што внел категоризација на „резидентно“ и „нерезидентно“ население, без да има законска основа за тоа – рече Снопче.
Според него, оваа пресуда значи дека и одлуката за бројот на советници е невалидна, бидејќи се темели на податоците од тој попис.
Во одговор, премиерот Мицкоски посочи дека токму разликите меѓу пописите креирале проблем, наведувајќи пример со Општина Гостивар, каде од 85 илјади жители бројот паднал на 59 илјади резидентно население.
– Дијаспората е нераскинлив дел од Македонија и затоа барам да поддржите една изборна единица, со што ќе им се овозможи на иселениците да гласаат – порача Мицкоски.
Тој најави дека Владата е подготвена да спроведе електронски попис веќе во 2026 година, со вкрстување на бази на податоци, што, како што рече, ќе опфати 90 отсто од населението, додека само 10 проценти ќе треба да се попишат теренски.
– Ќе предвидиме средства во Буџетот за оваа цел – рече Мицкоски.
Снопче му одговори дека за гласање на дијаспората не е неопходна една изборна единица, туку политичка волја на партиите.
Инаку, Уставниот суд вчера со мнозинство гласови укина делови од Методологијата за спроведување на пописот во 2021 година, кои се однесуваа на категоризацијата „резидентно“ и „нерезидентно“ население, оценувајќи дека таквата одредба е спротивна на Уставот и принципот на владеење на правото.
