РАМА ДО БРИТАНИЈА: Aлбанија не е хотел за одбиени азиланти
Албанскиот премиер Еди Рама жестоко ја критикуваше политиката на Велика Британија поради обидите на владата на Кир Стармер за депортирање на одбиените баратели на азил во трети држави.
Во интервју за „Гардијан“, Рама откри дека Велика Британија бара формирање „центри за враќање“ надвор од својата територија, каде би се сместувале мигрантите кои добиле одбивен одговор за азил. Тој оцени дека тоа е форма на притисок за создавање притворски кампови, и категорично изјави дека Албанија нема да учествува во таа шема.
„Албанија нема да биде дел од таа идеја, затоа што сме лојални на „нашиот брак со Италија“, и покрај тоа што судовите во Рим постојано ги блокираат депортациите“, изјави Рама.
Премиерот го осуди тонот и дискурсот што се користи во британската јавност кога се говори за мигрантите, нарекувајќи го „мрачен“ и „неприфатлив“ според стандардите пред Брегзит.
Инаку, Велика Британија и Албанија веќе потпишаа заедничка изјава за справување со нелегалната миграција, како и формирано работно тело, во време на претходната конзервативна влада. Според договорот, повеќе од 1.000 албански државјани се депортирани назад од Британија.
foto Facebook/Edi Rama
