Мицкоски: По 20 години време е ДУИ да премине во опозиција
Лидерот на ВМРО-ДПМНЕ, Христијан Мицкоски вели дека нивниот став многу пати го кажале и тој е непроменет, а тоа е дека очекуваат промена во составот на владата, односно 20 години присуство на ДУИ во владата е предолг период.
„Треба да се даде можност и прилика и на други“, вели Мицкоски.
Мицкоски потенцира дека консолидираната група на политичари и политички субјекти кои ќе се спротивстават на ДУИ на следните избори ќе постигне добар резултат.
„Барем нашите анализи се такви. Мислам дека тие малкумина во раководството на ДУИ по следните парламентарни избори ќе бидат изненадени непријатно од резултатот и ценам дека бројот на пратеници на тој консолидиран блок кај Албанците во Македонија заедно со останатите етнички заедници може да состави бадентерово мнозинство во парламентот“, изјави Мицкоски.
Во однос на избори Мицкоски изјави дека има три опции, првите две претседателски во март, а парламентарни во јуни, или едни заеднички, според најавите од владата, но трета опција е брзи избори оваа есен.
„Третата опција е да имаме избори оваа есен со тоа што ние како ВМРО-ДПМНЕ се согласуваме во измени во изборниот законик да практично биде избришан оној дел од техничката вада, да може оваа влада да ги подготви тие избори и да одиме на брзи парламентарни избори. Ценам дека оваа трета опција би била најдобра за иднината за граѓаните и иднината на Македонија“, порача тој.
