Мицкоски: Парите што порано завршуваа во приватни џебови, сега се во буџетот за граѓаните“ – Царината со рекордни приходи во април

Царинската управа оствари рекордни приходи во април, информираше премиерот Христијан Мицкоски преку својот фејсбук профил. Според објавата, во текот на минатиот месец наплатени се 11,7 милијарди денари, што е за 792 милиони денари повеќе од истиот период лани, односно зголемување од 7,3 отсто.

Особено значајни се растовите кај специфичните категории на приходи – приходите од данок на моторни возила се зголемени за 20,5%, од царини за 14,1%, а од акцизи за 16,3%.

„Истите овие средства веројатно порано завршувале во приватни џебови. Сега тие се во буџетот за граѓаните“, нагласи премиерот, додавајќи дека ова е доказ за одговорно и домаќинско управување.

Вкупно, од почетокот на годинава, Царинската управа има наплатено 41,2 милијарди денари – за 1,6 милијарди денари повеќе од првите четири месеци во 2024 година, што претставува пораст од 4,1 отсто.

Мицкоски порача дека овие резултати се јасен показател дека институциите работат во интерес на граѓаните, а не на привилегираните поединци.