Мицкоски: Незнаење или манипулација е тврдењето на власта за влезот на Бугарите во Уставот
Тврдењата на власта дека со влез на Бугарите во Устав се прави дистинкција со Македонците или се резултат на незнаење или на свесно манипулирање, изјави претседателот на ВМРО-ДПМНЕ Христијан Мицкоски одговарајќи на новинарски прашања на отворањето на политичката академија во организација на Партискиот истражувачки и аналитички центар „Љубиша Георгиевски“ со поддршка на меѓународни институции како Фондацијата Конрад Аденауер.
Тоа, како што вели Мицкоски, „е една многу погрешна констатација која што изминатиот период ја зборуваше прво Али Ахмети, потоа дел од министрите кои што доаѓаат од ДУИ, а сега почнуваат да го зборуваат и Ковачевски, Маричиќ и останатите од СДСМ“.
Мицкоски посочи дека ги разбира преставниците на власта затоа што тие изгледа дека многу не другарувале со книгите, па не ги разбираат работите и поради тоа се обидуваат, нешто кое што го слушнале, недослушнале да го прераскажуваат.
-Ниту авторот на живковизмот немал проблем со современата македонска нација. Ниту тој имал проблем, ниту пак сега и неговите следбеници во Бугарија, а еден од нив е претседателот Радев. Тие немаат проблем со македонската нација која е резултат на формирањето на современата македонска држава како резултат на одржаните собранија на АСНОМ и АВТОЈ и така натаму. Тие имаат проблем со македонскиот народ претходно, значи пред да се формира македонската држава и македонската нација, тоа е проблемот. Тие велат дека македонскиот народ е всушност бугарски народ и тоа е суштината. Никој од нив нема проблем кога вели, видете современата македонска нација е резултат на заседанијата на АСНОМ и на АВНОЈ, антифашистичката борба и формирањето на македонската држава, тоа треба секој да го знае. Тука нема никој проблем, туку што се случувало претходно. Тие велат, да тогаш се формираани тие ентитети, но претходно таму постоеле Бугари и живееле Бугари, тоа е суштината, рече Мицкоски.
Ваков тип на тврдења, според него, се резултат или на непознавање или на свесно манипилирање.
Во однос на македонскиот јазик, Мицкоски посочи дека тој е службен јазик на ОН уште од 1945 годи и е кодифициран на Атинската конвенција во 1977 година, додека пак службен јазик на Европска Унија ќе стане кога Македонија ќе биде полноправна членка што не се знае кога ќе се случи и заради што ВМРО-ДПМНЕ бара гаранции.
-Што се однесува до јазикот, тоа е многу важно да се каже, бидејќи често пати се експлоатира тезата во јавност за договорот со ФРОНТЕКС. И тоа е уште една небулоза и уште една лага и манипулација. Македонскиот јазик е дел од официјалните јазици на обединетите нации уште од 1945 година, кога поранешната федерација станува членка на Обединетите Нации, а со тоа трите тогаш официјални јазици на поранешната федерација, српско-хрватски, словенечки и македонски стануваат официјални јазици на Обединетите Нации. Кодифициран е 77-мата година за време на атинската конференција 1977 година, а ќе стане официјален јазик на Европската Унија тогаш кога Македонија ќе стане членка на Европската Унија. А кога ќе стане Македонија членка на Европската Унија, гледате дека немаме гаранции. Тоа е она кое што ВМРО-ДПМНЕ го бара, гаранции. Еден од трите столба е тоа што ВМРО-ДПМНЕ го бара, а тоа се гаранции, истакна Мицкоски.
Лидерот на ВМРО-ДПМНЕ зборувајќи за заканите упатени кон него и неговото семејство, рече ќе продолжи да се движи слободно бидејќи не се чувствува дека на некој нешто му погрешил за да биде исплашен.
-Навикнат сум на таков тип на закани петта година по ред и не е тоа нешто ново да мене ми се случува и на моето семејство, и тие се навикнуваат веќе на ваквите закани. Тоа е амбиентот во кој живееме во Македонија. Секоја недела по некое ново убиство, се закануваат на политичари луѓе кои не им е прв пат тоа знаете има и такви кои многу пати досега се заканувале, изјави Мицкоски.
Тој рече дека не пријавил во полиција и нема намера да пријавува. – Сум кажал многу пати во минатото дека јас сум единствен претседател на партија кој од државата нема обезбедување и покрај тоа што има загрозена безбедност, но сега нема да го прифатам и да ми го даде Спасовски или Зарко од агенцијата за национална безбедност, рече Мицкоски.
