Мицкоски: Некои судии и обвинители не ја заслужуваат платата што ја земаат, ќе направиме серијал на случаи!
По реакциите на здруженијата на судиите и обвинителите дека нивните примања се најниски во регионот, премиерот Христијан Мицкоски оцени дека барањата за повисоки плати ја откриваат вистинската цел на дел од правосудниот систем.
„Сега веќе на цела Македонија ѝ е јасно дека не зборуваме за суштински реформи во судството и обвинителството, туку зборуваме за зголемување на буџетите, односно за зголемување на платите,“ изјави Мицкоски.
Тој притоа посочи дека постојат професионалци кои чесно ја вршат својата работа во согласност со законите и Уставот, но и „мал дел“ кој, како што рече, го загрозува целиот процес. „Има такви кои не ја заслужуваат ни оваа плата што ја земаат,“ додаде премиерот.
Во однос на барањата за зголемување на примањата, Мицкоски нагласи дека останува на јавноста да одлучи дали државата треба да издвојува двапати повеќе средства за судиите и обвинителите одошто тоа го прават некои поразвиени членки на Европската унија.
„Ќе почнеме еден цел серијал на случаи како обвинувале некои од јавните обвинители, и како суделе некои од судиите. Јавноста нека суди па нека кодошат таму по Брисел или каде и да одат дека Владата не им ги зголемила платите“, додаде Мицкоски.
