Мицкоски: Не бев статиста во Давос, не барав селфи по ходници, сите говори ми беа проследени со аплауз
Претседателот на Владата, Христијан Мицкоски, учеството на економскиот форум во Давос го оцени како историски успешно, нагласувајќи дека неговата улога била активна и суштинска. Тој потенцираше дека на форумот учествувал на три различни панели со луѓе од врвот на светскиот бизнис, чија вредност често се мери во трилиони долари.
„На еден од панелите, говорници со мене, бидејќи јас не бев статиста таму, или по ходници да барам селфи со учесниците на Давос, туку бев активен учесник на три панели, и морам да кажам, штета што не можеме да ги објавиме моите говори, но сите беа проследени со аплауз од страна на присутните“, истакна премиерот.
За време на официјалната вечера за 500/600 одбрани гости, премиерот посочи дека на иста маса седел со влијателни личности како главниот извршен директор на „Гленкор“, поранешниот прв човек на „IT&T“ и сегашен член на бордот на „Локид Мартин“, Џо Донован, како и со австрискиот канцелар и директорката на Интерпол.
На панелите, тој дискутирал рамо до рамо со американскиот државен секретар за енергија, Рајт, и главниот извршен директор на светскиот енергетски гигант „Арамко“.
