Мицкоски го пофали Тутунски комбинат: Акционерското друштво е консолидирано

Премиерот Христијан Мицкоски денеска го посети АД Тутунски комбинат – Прилеп и при тоа го пофали ова акционерско друштво кое е во државна сопственост дека е консолидирано и дека работи позитивно. Тој додаде дека во моментов претпријатието ги пласира своите производи на девет пазари.

„Очекувам овој период на консолидирање на тутунскиот комбинат Прилеп да е веќе позади нас. Состојбата од тоа што можев да видам е консолидирана и очекувам во годините коишто следат повеќе внимание да посветиме на развојот, на нови инвестиции, на зголемување на производството, зошто овие 9 пазари да не бидат 18 пазари за некоја година од денеска. Тоа е она на коешто сите ние треба заедно да работиме и тоа е она за коешто оваа Влада ќе даде безусловна поддршка и очекувам овие услови да бидат дел од нашата заедничка соработка и во иднина.

Многу е направено и многу е постигнато во овие години, состојбата е консолидирана, ајде сега сите заедно да работиме на развојот, тоа е она што е наш приоритет“, објави премиерот.