Мицкоски: Јасен е победникот на овие локални избори, ние веќе правиме план за денот потоа бидејќи денот потоа ќе значи силна Влада!
Премиерот Христијан Мицкоски денеска по поставувањето камен-темелник на Дом за стари лица во Општина Зрновци изјави дека се труди пораките што ги испраќаат да бидат над ситуацијата и насочени кон смирување.
„Избори се, логично е да има искри во одредени општини низ Македонија. Би било нелогично ако не е така. Иако победникот на овие локални избори е јасен, веќе размислуваме за денот по изборите, бидејќи тој ден ќе означи силна Влада предводена од ВМРО-ДПМНЕ и коалицијата, со голем број општини под водство на владината коалиција“, рече Мицкоски.
Одговарајќи на новинарско прашање дали е задоволен од предложените кандидати за градоначалници, премиерот посочи дека се труделе да бидат објективни и да донесат најдобри одлуки врз основа на достапните информации.
„Имам доверба во секој од предложените кадровски решенија. Верувам дека ќе постигнат извонредни резултати. Ние секојдневно ја следиме нивната работа, и доколку забележиме намалување на динамиката и темпото на реализирање на ветените политики спрема граѓаните, ќе реагираме. Никој не е вечен, и ништо не е загарантирано однапред. Секој мора да се потруди максимално и да испорача она што му е ветено на граѓаните“, нагласи премиерот во Зрновци.
