Мицкоски: Армијата е срцето на државата, силна Армија значи сигурна Македонија
По повод 18 Август – Денот на Армијата, премиерот Христијан Мицкоски упати честитка истакнувајќи дека Армијата претставува гарант за развојот и иднината на македонскиот народ.
„Денес го славиме Денот на Армијата – еден од темелите на државноста. Кога зборуваме за Армијата, зборуваме за продолжение на илинденската и асномската идеја – идејата за независна и слободна Македонија. Нашите претци се бореле со срце, со жртва и со визија“, напиша Мицкоски на својот Фејсбук профил.
Тој нагласи дека Армијата денеска е симбол на новото време, во кое државата вложува во опрема, инфраструктура и подобри услови за достоинствен живот и работа на војниците.
„Оваа Армија стои рамо до рамо со сојузниците во светот, но и цврсто на својата земја, секогаш кога граѓаните се во неволја. Вие сте први на линијата на одбрана, но и први кои покажуваат што значи служење на народот. Армијата е срцето на државата – ако тоа срце чука силно, тогаш и државата е здрава и сигурна. Нашата Армија чука силно, затоа Македонија ќе оди напред. Да живее Армијата!“, порача премиерот.
Мицкоски денеска присуствуваше на централната свеченост по повод Денот на Армијата во касарната во Штип, каде обраќања имаа и претседателката Гордана Силјановска-Давкова, министерот за одбрана Владо Мисајловски и началникот на Генералштабот на Армијата, генерал-мајор Сашко Лафчиски.
