Мицкоски: Алиу ќе донесе нова енергија во здравството, Хоџа ќе биде силна потпора во земјоделството

Во рамки на 54. седница на Собранието, се расправа по предлогот на Владата Азир Алиу да биде назначен за министер за здравство. Премиерот Христијан Мицкоски во образложението истакна дека Алиу, како доктор по информатички науки и професор со искуство во управување со системи и податоци, ќе внесе нова енергија и пристап во менаџирањето со здравствениот систем.

„Во време кога некои држави со еден клик добиваат дијагноза, ние сè уште трчаме. Време е тоа да се промени. Веќе направивме исчекори – започнавме со скрининг програми, ги намаливме листите на чекање, додадовме нови лекови на позитивната листа и работиме на законски измени. Во овој процес, доктор Алиу ќе има моја поддршка, но и силна лична одговорност“, изјави Мицкоски.

Тој додаде дека во изминатата година Владата чекор по чекор ја враќа довербата на граѓаните, градејќи институции кои служат подеднакво на сите.

Премиерот исто така го образложи и предлогот за Албрим Хоџа како заменик-министер за земјоделство, шумарство и водостопанство. Хоџа, како што наведе, е млад, но искусен кадар, кој ја познава состојбата на теренот и ќе биде силна потпора на министерот.

„Земјоделството не е само економија – тоа е живот. Тоа се семејства, полиња, храна, безбедност. За жал, со години беше запоставено. Ние отплатуваме долгови уште од 2021 година. Време е за системски пристап и визија за иднината“, потенцира Мицкоски.

Тој подвлече дека овие две кадровски решенија не се изолирани, туку дел од поширок процес на реформи и обновување на институциите.

„Од првиот ден, Владата има јасна цел – резултати. Не декларации, туку конкретни резултати. Во првите 100 дена обезбедивме стабилност, раст на економијата, зголемена наплата на даноци без зголемени стапки и нови инвестиции. Граѓаните конечно почнуваат да веруваат во систем што функционира. Денес гласате за продолжување на овој процес“, рече тој.

Според биографијата објавена на веб-страницата на Собранието, Азир Алиу е дипломиран електроинженер и доктор по информатички науки. Во моментов е редовен професор на Факултетот за компјутерски науки и технологии при Универзитетот на ЈИЕ во Тетово. Беше министер за информатичко општество и администрација во 2023 и 2024 година, и има извршувано и други одговорни функции. Алиу е член на Алијансата за Албанците, која остана дел од коалицијата „Вреди“ и по заминувањето на Арбен Таравари во опозиција.

Албрим Хоџа, предложен за заменик-министер, е новинар со повеќегодишно искуство. Дипломирал на Правниот факултет при Државниот универзитет во Тетово.