МИЦЕВСКИ ЗА СЛАВЕСКИ: Никој не ја оспори неговата квалификацијата и професионалниот интегритет
Според координаторот на пратеничката група на ВМРО-ДПМНЕ Никола Мицевски, Трајко Славески се покажал како човек кој знае да се грижи за државните интереси и монетарната политика во наредниот период ќе биде во сигурни раце.
Тој истакна дека не очекува опозицијата да го смени ставот и да гласа за неговиот избор за гувернер на Народната банка.
„Тие го дадоа својот коментар по однос на Трајко Славески кој е предложен за гувернер. Она што деновиве провејуваше низ јавноста, а можев да го видам од сите страни, тоа е дека никој не ја оспори квалификацијата и професионалниот интегритет на Славески. Јас сум убеден дека времето ќе ги дематира СДСМ“, рече Мицевски.
За иден гувернер претседателката на државата, Гордана Сиљановска-Давкова го предложи универзитетскиот професор Трајко Славески од Економскиот факултет во Скопје, кој треба да ја замени досегашната гувернерка Анита Ангеловска-Бежоска. За избор на Славески се потребни 61 глас. Славески е актуелен претседател на Советот на Град Скопје, а претходно беше министер за финансии.
