„Mи имаа подметнато туѓи фискални сметки“: Силвана Бонева ослободена од обвинението
Поранешната пратеничка Силвана Бонева која беше осомничена за случајот „Друмарина“ за измама во службата доби ослободителна пресуда.
Основниот кривичен суд Скопје соопшти дека Бонева е ослободена од обвинение.
„Основниот кривичен суд Скопје, денеска ( 16.02.2024 год. ) на јавна расправа, ја објави пресудата за кривичниот предмет со К.бр. 2799/20, во јавноста познат како „Друмарина“, против обвинетата С.Б. за кривичното дело Измама во службата од чл. 355 ст. 3 вв ст.1 вв чл. 45 од КЗ со која обвинетата ја ослободи од обвинение. Според првостепената, неправосилна, пресуда судот утврди дека Јавниот обвинител, надвор од разумно сомнение, не го докажа делото кое и се става на товар на обвинетата, а во однос на оштетното побарување на РСМ, застапникот го упати на спор“, се наведува во соопштението.
Според нив, донесено е и решение со кое се укинува времената мерка – Забрана за отуѓување и ставање под хипотека на недвижен имот на име на обвинетата и нејзиното семејство.
Инаку, Бонева се гонеше дека во периодот од 2011 до 2015 година до службите во Собранието поднесувала лажни фискални сметки од патарини, по што и биле исплатени над 10 илјади евра, иако имала стан во Скопје и не патувала за да присуствува на седници на Собранието.
На ова со реакција се јави и самата Бонева која вели дека вистината излегла на виделина.
„Ослободителна пресуда! После 6 години голгота, правдата победи! Вистината излезе на виделина!
Со 21 сведок и 7.179 докази, се срушија како кула од карти лагите и клеветите дека божем нешто сум злоупотребила, исто како што се сруши со години повторуваната лага дека сум била рекордер во земање на патни трошоци.
Наместо Oбвинителството да го докаже обвинението дека сум поднесувала лажни фискални сметки, јас докажав дека Oбвинителството како докази против мене имаше подметнато туѓи фискални сметки од други лица, прикажувајќи ги како да се мои.
Го побив обвинението дека не сум патувала на седници од Струмица за Скопје и докажав дека патував додека бев пратеник во тој период, a Собранието ми исплатило патни трошоци согласно закон, исто како и на другите пратеници.
Дополнително, преку фотографиите постирани на фејсбук и сведоците, докажав дека не само што сум патувала на седници, туку и дека скоро на секои 2 дена во тој период патував на свој трошок на средби со граѓани низ целата држава, иако за такви активности Собранието не исплаќаше патни трошоци.
Се потврди дека прогонот на СЈО беше чиста политичка пресметка, a обвинението против мене целосно неосновано и политички мотивирано.
Му благодарам на Бога што ми даваше сила да го издржам оваа распетие!
Им благодарам на сите вистински пријатели кои веруваа во мене и ми даваа сила да издржам!
Се надевам дека конечно ќе почиваат во мир моите најмили, кои не го дочекаа овој ден!
