Меси прифаќа да игра за значително помала плата во Барселона – можно е враќање на Камп Ноу
„Во контакт сме со луѓето од кампот на Лео Меси“, изјави денеска потпретседателот на Барселона, Рафа Јусте и ја крена на нозе јавноста во Каталонија.
„Лео и неговото семејство знаат колку се сакани. Бев дел од преговорите кои за жал завршија неуспешно, трн во око ми е тоа што тој мораше да замине, па би сакал да се врати“.
На ваквите коментари потоа се надоврза и Чави, кој порача дека сите сакаат да го видат последниот танц на Лео Меси во Барселона како Мајкл Џордан и само дотури масло во оганот.
„Не е првпат да зборуваме за враќање на Меси. Јас разговарам многу со него. Тоа е нешто на кое работиме и се надевам дека ќе го видиме повторно во Барселона. Тоа е клубот на неговиот живот. „Сите сакаат да го видат последниот танц на Меси како Мајкл Џордан“, рече тренерот на Барса.
Барселона е во незавидна финансиска состојба, но новинарката Вероника Брунати објави дека парите нема да бидат проблем, наводно Лео Меси ќе прифати да игра за 10 милиони евра по сезона, плус варијабилен дел поврзан со спонзорските договори.
Останува да се види што ќе рече Ла Лига на една ваква зделка, од таму веќе и порачаа на Барселона дека мора да ја намалат сметката за плати за 200 милиони евра. Поради финансискиот фер-плеј овој месец беше поништена регистрацијата на Гави, Шпанецот во продолжението од сезоната ќе настапува како младинец и доколку „каталонците“ не најдат начин новиот договор да му го регистрираат до 1. јули, ризикуваат беспари да го загубат.
