Менди Ќура повторно во СКСЗМ, овојпат како кандидат – планови за почиста и поорганизирана Струга
Менди Ќура, поранешниот претседател на Стопанската комора на Северо-Западна Македонија, кој сега се кандидира како независен кандидат за градоначалник на Струга, се сретна со своите поранешни колеги од Комората за да разговара за можностите за заедничка соработка.
На средбата, Ќура најави дека ќе воспостави партнерство со приватна компанија за селекција на отпадот во Струга, како дел од напорите за подобра заштита на животната средина.
„За општина Струга започнуваме соработка која се однесува на селекција на отпадот, што ќе биде од големо значење за граѓаните. Од првиот ден ќе работиме со Стопанската комора, која има искуство и капацитет да придонесе во реализацијата на вакви проекти. Нашата цел е да го искористиме тоа знаење за доброто на сите жители на Струга“, изјави Ќура.
Од Стопанската комора на Северо-Западна Македонија информираа дека на кандидатот му доставиле платформа со конкретни предлози, меѓу кои и барања за решавање на проблемот со дивите депонии и подобра заштита на животната средина. Вршителот на должноста претседател на Комората, Нухи Алиу, нагласи дека Струга се соочува со сериозни здравствени проблеми поврзани со загадувањето.
„Струга е означена како град со висока стапка на заболени од рак во однос на бројот на жители. Господинот Ќура презентираше конкретни проекти кои имаат цел да ги ублажат факторите што го предизвикуваат ова, со што ќе придонесе за подобрување на здравствената состојба на населението“, изјави Алиу.
На средбата биле отворени и други теми важни за локалниот развој – меѓу нив забрзување на издавањето градежни дозволи, донесување на урбанистички планови, поголема транспарентност на општината и поефикасна администрација.
Да потсетиме, Менди Ќура ја има поддршката од коалицијата ВЛЕН во трката за градоначалничката функција во Струга.
