МЕКСИКО ГО ВОЗВРАЌА УДАРОТ: И тие ќе преземат мерки против САД
Meксико воведува контратарифи за САД.
Мексиканската претседателка Клаудија Шејнбаум синоќа нареди контратарифи како одговор на одлуката на САД да воведат царини од 25 отсто за сите стоки што доаѓаат од Мексико. Шејнбаум објасни дека Мексико е принудено да одговори на ист начин.
„Му наложив на министерот за економија да го спроведе планот Б на кој работевме, што вклучува царински и нетарифни мерки за одбрана на интересите на Мексико“, објави Шејнбаум.
САД се убедливо најважниот странски пазар во Мексико, при што Мексико ја престигна Кина во 2023 година и стана главната дестинација за американскиот извоз.
Мексико подготвува можни одмазднички тарифи кои се движеле од пет до 20 отсто на свинското месо, сирењето, свежи производи, како и на челик и алуминиум од САД.
Извозот на САД во Мексико во 2023 година изнесуваше над 322 милијарди долари, покажуваат податоците на Бирото за попис, додека САД увезоа мексикански производи во вредност од повеќе од 475 милијарди долари.
Американскиот претседател Доналд Трамп воведе царини за стоките од Канада, Кина и Мексико.
