МЕЧКИНО СЦЕНАРИО ЗА ДОЛАРОТ: Зошто стратезите за валути очекуваат уште поголем пад?
Американскиот долар значително ослабе во последните месеци,
а многу аналитичари веруваат дека овој тренд ќе продолжи, поради сложените
економски и геополитички околности.
Од почетокот на 2025 година, голем број фактори придонесоа
за пад на вредноста на доларот во однос на другите валути. Индексот на
американскиот долар, кој ја следи вредноста на доларот во однос на кошничката
светски валути, падна за 7,5
проценти од почетокот на годината.
Доларот претрпе посебен удар на почетокот на април, кога
глобалните пазари беа потресени од најавата за нов пакет агресивни царини што
ги објави претседателот Доналд Трамп. За разлика од претходните епизоди на
пазарни превирања, овој пат инвеститорите не го гледаа доларот како безбедно
засолниште.
Зошто доларот паѓа?
Аналитичарите посочуваат неколку причини: забавување на
американската економија, инфлаторни притисоци предизвикани од царините и
растечки сомнежи кај меѓународните инвеститори во врска со фискалната политика
на Соединетите Американски Држави. Минатата недела, „Мудис“ го намали
кредитниот рејтинг на САД, со што доларот дополнително ослабе.
„Ова не е само прашање на тарифи“, рече Стив Енгландер од
Стандард Чартерд Банк. „Тоа е многу поширок сет на политики што воведуваат
неизвесност.“
Експертите за валутна стратегија очекуваат доларот
дополнително да падне. Послабиот долар може да му помогне на американскиот
извоз со тоа што ќе ги направи стоките поевтини во странство, но може да им
наштети на увозниците и да предизвика нови зголемувања на цените.
Спротивно на очекувањата – царините не го
зајакнаа доларот
Според класичната економска логика, новите царини треба да
го зајакнат доларот бидејќи го намалуваат увозот и трговскиот дефицит. Сепак,
пазарите реагираа на спротивен начин. Довербата на инвеститорите во фискалната
и трговската стратегија на САД е нарушена, што предизвика бегство од доларот.
„На почетокот на годината, постоеше општо верување дека
новата политика на Вашингтон ќе биде од корист за американската економија“,
вели Тиери Вајзман од „Меквери“. „Но, веќе во февруари, непредвидливоста на
тарифите ја промени сликата.“
Рејтингот и долгот
како дополнителни проблеми
Мудис го намали кредитниот рејтинг на САД минатата недела,
наведувајќи го зголемениот долг и недостатокот на политичка волја за ставање
под контрола на дефицитот. Според аналитичарите на „Голдман Сакс“, ова би
можело да ги зголеми трошоците за задолжување во САД, бидејќи инвеститорите ќе
бараат повисоки каматни стапки како компензација за ризикот.
Дали е загрозен
статусот на доларот како глобална резервна валута?
Иако вредноста на доларот паѓа, аналитичарите не веруваат
дека е во непосредна опасност да го изгуби својот глобален статус. „Во моментов
нема сериозна алтернатива на доларот“, вели Самуел Зиф од JPMorgan Private
Bank.
Сепак, сè повеќе глобални инвеститори ја преиспитуваат својата
изложеност на американската валута и
бараат диверзификација на портфолиото. Промените се случуваат постепено, но
стратезите во Банката на Америка предупредуваат дека „почнува да се
материјализира структурно мечкино сценарио за доларот“.
EPA-EFE/Juan Ignacio Roncoroni
