Мечки кај шарпланинските села: Прехраната е опасна и погрешна
По апелот на Националниот парк „Шар Планина“ за донации од пченка и јаболка за прихрана на мечките, Македонското еколошко друштво (МЕД) остро реагираше, предупредувајќи дека таквиот пристап е штетен на долг рок. Екологот Диме Меловски од МЕД посочи дека оваа практика може да има сериозни последици врз однесувањето на мечките и нивниот однос со луѓето.
– Мечките се навикнуваат на храна од човек и почнуваат да ја бараат кај населени места. Подоцна, кога ќе престане прихраната, се појавуваат конфликти, вели Меловски, додавајќи дека такви примери се веќе видени во земји како Романија, каде мечките редовно доаѓаат покрај патишта и се приближуваат до автомобили.
Тој посочи неколку клучни ризици од ваквото однесување:
Во земјава, според проценките, живеат околу 300 до 350 кафеави мечки, најмногу во западниот дел на Македонија. Видот е трајно заштитен, но нивната појава во близина на села и населени места, како што беше случајот во Галичник и дебарските села минатата есен, буди страв кај локалното население.
– Прихраната е краткорочно решение со долгорочни последици. Тоа не е одржлива стратегија за управување со дивеч. Не за џабе се вика ‘дивеч’, истакна Меловски.
И странските практики покажуваат слични проблеми. На пример, Одделот за заштита на животната средина во Њу Џерси повикува жителите да не ги хранат мечките, зашто тоа води до нивна почеста појава во урбани места, при што претставуваат ризик за безбедноста на луѓето и имотот.
Од МЕД апелираат до институциите да се фокусираат на долгорочни решенија и едукативни кампањи, наместо на практики кои создаваат зависност кај дивите животни.
