Меџити за шталата каде гореа батерии: Има важечка 10 годишна дозвола за работа
Пожарот во Трубарево, кој од вчера ги вознемири жителите на скопската котлина, избувнал во објект за рециклирање на батерии и електронски отпад, што покрена сериозна загриженост за можното испуштање на токсични материи во воздухот. Оваа информација утрово околу 02 часот од лице место ја потврди првиот вицепремиер и министер за животна средина, Изет Меџити.
„Дојдов во Трубарево и од терен со свои очи го видов ужасот што го предизвика овој сериозен инцидент“, изјави Меџити, кој беше во увид на опожарената локација.
Тој ги увери граѓаните дека ситуацијата е ставена под контрола благодарение на навремената интервенција на сите надлежни служби. Како клучен чекор, министерот најави дека веќе се вршат мерења на квалитетот на воздухот.
„Од 14:00 часот, инспекторите се на терен и вршат мерења. Првите резултати од Државниот инспекторат и од специјализираните лаборатории се очекуваат многу наскоро и ќе бидат јавно достапни веднаш по нивната обработка“, рече Меџити.
Додека се чекаат резултатите, министерот апелираше до граѓаните да ги почитуваат препораките на надлежните институции за заштита на здравјето. Тој исто така информираше дека компанијата во чиј објект избувна пожарот поседува важечка десетгодишна дозвола за работа, издадена во 2021 година.
„Во тесна соработка сме со сите институции за што побрзо и поефикасно надминување на оваа несреќа“, заклучи Меџити.
