Меџити: Професорот Јовев ми е пријател, сега ќе има време да им се посвети на пациентите
Министерот за здравство Фатмир Меџити на брифинг со новинарите рече дека разрешениот директор на Кардиологија, професор Сашко Јовев му е пријател и пред неколку дена пиеле заедно кафе, а го разрешил за да има повеќе време да им се посвети на пациентите.
„Професорот ќе продолжи со работа како здравствен работник и ќе биде послободен од административни обврски, ќе има повеќе време за пациентите. Разрешувањето е во правец на подобрување на здравствените услуги“ вели Меџити.
Според информациите, причината за разрешувањето е несогласност за дежурства во текот на 2022 година.
Тој го повика д-р Јовев да му биде советник во Кабинетот, како национален координатор за кардиохирургија.
Адвокатот Мите Михајловски кој ја предводи групата од седум адвокати на доктор Сашо Јовев вчера пред медиумите го коментираше решението за разрешување на неговиот клиент.
– Решението е навистина навреда за здравиот разум на сите нас. Во него стои дека за 2022 година има исплатни листи за дежурства, а дежурството не го одобрил министерот за здравство. Само тоа е причината поради која се разрешува д-р Јовев. Вчера слушнавме на телевизија дека станува збор за којзнае какви злоупотреби, а повторувам дека единствената причина се дежурствата. Јас како правник поставувам прашање, како може една ваква клиника да нема дежурства, нормално дека не може да функционира, а единствена злоупотреба е доколку министерот на дал согласност. Од далеку се гледа дека нема никаква повреда, туку нешто друго е во заднина за ова разрешување – рече адвокатот Михајловски.
Тој додаде дека ќе биде поднесена тужба против министерот, затоа што според тимот, нема никаков основ за разрешување на доктор Јовев.
