Меџити го нарече Таравари „министер за канабис“, Таравари најави тужба за клевета!
Политичката дебата околу производството на канабис во земјава е повторно во центарот на вниманието, откако градоначалникот на Општина Чаир, Изет Меџити, го критикуваше поранешниот министер за здравство Арбен Таравари за издавањето на лиценци за производство на марихуана.
Меџити, чија партија е дел од владејачката коалиција ВЛЕН, вчера во гостување на ТВ Лајм рече дека Таравари, додека бил министер за здравство, потпишал седум лиценци за одгледување на канабис.
„Денеска имаме тема за канабис, па затоа е добро јавноста да знае дека тој (Таравари), во својство на министер за здравство, за четири-пет месеци, за седум месеци, потпишал седум лиценци за одгледување на канабис. Значи, тој не беше министер за здравство, туку министер за канабис, министер за марихуана. Со тоа, тој го донесе подземјето на регионот на Македонија, а денес ги гледаме политиките што тогаш ги спроведуваше“, рече Меџити.
По изјавата на Меџити, Таравари се огласи на својот Фејсбук-профил, најавувајќи тужба за клевета. Тој истакна дека ќе ја повлече тужбата само доколку добие јавно извинување од градоначалникот на Чаир.
„Немам друг начин, освен правен, за да одговорам на сериозните клевети што повторно се упатени кон мене. Така, господинот Меџити рече дека во мое време сум издал седум лиценци за одгледување канабис и ме нарече министер за канабис. Ќе поднесам тужба за клевета и ќе ја повлечам само ако ми упати јавно извинување“, напиша Таравари.
Таравари ја извршуваше функцијата министер за здравство од јуни 2024 до мај 2025 година, кога ја напушти коалицијата ВЛЕН и на локалните избори настапи во коалиција со ДУИ.
Инаку, Владата пред два дена донесе одлука за спроведување вонредни контроли во сите правни лица и објекти кои имаат лиценци за одгледување марихуана за медицински цели. Министерот за внатрешни работи, Панче Тошковски, соопшти дека комисија од Министерството за здравство констатирала дека дел од марихуаната била незаконски произведена, складирана и чувана. Од ОЈО ГОКК засега нема наредба за спроведување истрага, ниту осомничени во случајот со запленетата марихуана.
