Мажи на возраст од 40 години се првите потврдени случаи на мајмунска сипаница – не патувале надвор и не се поврзани!
Двајца мажи од Скопје, родени во 1981 и 1985 година, се првите потврдени случаи на мајмунски сипаници во земјава оваа година. Информацијата беше потврдена на денешната прес-конференција од страна на директорката на Институтот за јавно здравје, д-р Марија Андоновска.
Како што истакна таа, ниту еден од заразените пациенти не патувал надвор од државата, што, според здравствените власти, укажува на можна локална трансмисија.
„Станува збор за два неповрзани случаи. Едниот пациент е веќе хоспитализиран на Инфективната клиника во Скопје, додека другиот сè уште не е пријавен во ниту една здравствена установа и не е хоспитализиран,“ рече Андоновска.
Таа ги повика граѓаните на внимателност, но и на воздржаност од паника, нагласувајќи дека состојбата е под контрола и дека здравствениот систем активно ги следи случаите.
Заменик-министерот за здравство, Јовица Андоновски, соопшти дека денеска попладне ќе заседава Комисијата за заразни болести, каде што ќе се разгледаат сите аспекти на ситуацијата и ќе се донесат соодветни мерки.
