Маж преживеа вадејќи му ја главата од вилиците на крокодил
Австралиец си го спасил животот со тоа што буквално му ја извадил главата од вилиците на крокодил. Инцидентот се случил додека мажот нуркал во одморалиште во близина на Квинсленд, јавува Би-Би-Си.
Маркус Мекгован (51) со хеликоптер бил префрлен во најблиската болница на островот. Тој им кажа на новинарите дека бил во вода со група пријатели на околу 28 километри од островот Хагерстоун кога неочекувано бил каснат.
„Мислев дека е ајкула, но кога ја подадов раката сфатив дека е крокодил. Можев да му ги отворам вилиците доволно за да ја извадам главата“, им рече тој на новинарите.
Рептилот се вратил и се обидел повторно да го касне, но тој успеал да се избори. Но, тој доби и рана на едната рака.
Нападите од крокодили се невообичаени во Австралија, но имало неколку во последните месеци, објавија локалните новински агенции.