Матичните гинеколози наплаќале илјадници денари за услуги кои се БЕСПЛАТНИ – ги казнија 25.000 денари!
Пациентките во Македонија со години биле жртви на незаконска наплата кај своите матични гинеколози.
Иако прегледите, ехо-дијагностиката и ПАП-тестовите се бесплатни, многу ординации наплаќале од 500 до неколку илјади денари под изговор за „издавање ЦД“, лекарски извештаи или транспорт на брисеви до лабораторија.
Заедничката контрола на Фондот за здравствено осигурување (ФЗО) и Управата за јавни приходи (УЈП) откри поразителни резултати. Од 49 контролирани ординации, дури кај половината се пронајдени неправилности. Осум ординации директно наплаќале за бесплатни услуги, додека една третина имале проблеми со фискализацијата и прикривање на готовинскиот промет.
Директорката на УЈП, Елена Петрова, предупреди дека неевидентирањето на приходите во приватните ординации отвора простор за затајување данок и стекнување личен имот од неоданочени средства, што директно ја поттикнува сивата економија.
Ординациите кај кои се утврдени прекршоци се казнети со по 25.000 денари. Од Фондот предупредуваат дека ова е само прва мерка – доколку лекарите продолжат со истата пракса, следен чекор е трајно раскинување на договорите со овие здравствени установи.
