Маса со адвокати ќе се бори за титулата на Хамилтон од 2008 година

Таа трка е позната по инцидентот кој го предизвика Нелсон Пике јуниор, што предизвика излегување на безбедносното возило на патеката и така му помогна на својот колега од Рено, Фернандо Алонсо да дојде до победата.

Освен тоа, при излегувањето на безбедносното возило Маса влезе во пит-бокс како првопласиран, а се врати дури на 13. место и остана без важни бодови во трката за титулата. Неговиот главен конкурент Луис Хамилтон го освои третото место и на крајот ја освои титулата.

По трката за Големата награда на Бразил, последна која се возеше таа сезона, Хамилтон имаше само еден бод повеќе од Маса и дефинитивно инцидентот од Сингапур го реши прашањето за светски шампион.

Маса реши да се консултира со адвокатски тим 15 години по инцидентот поради изјавата на поранешниот прв човек на Ф1, Берни Еклстон.

„Решивме тогаш ништо да не направиме. Сакавме да го заштитиме нашиот спорт од голем скандал. Дадов сè од себе да го убедам Пике да молчи. Тогаш постоеше правило дека пласманот на крајот на сезоната на никаков начин не може да се промени по церемонијата за доделување на наградите во организација на ФИА. Хамилтон ја доби титулата и сè беше во ред. имавме доволно време да истражиме што се случувало, но според правилата, требаше да ја поништиме трката во Сингапур, а во таков случај Маса ќе беше шампион“, кажа Еклстон.