Марш за Ангелите во Кочани: Во тишина и болка, со повик за правда!

Со силна емоција, бели балони и тишина исполнета со болка, вечерва низ улиците на Кочани се одржа „Марш за Ангелите“ – настан посветен на сеќавањето на прерано изгубените млади животи од дискотеката Пулс во Кочани.

Маршот, кој стана симбол на солидарност, поддршка и трагање по одговорност, ги собра семејствата, пријателите и граѓаните кои со фотографии ги оддадоа своите почит и љубов кон лицата кои повеќе не се меѓу нас. Учесниците во маршот, облечени претежно во црно, симболично ја искажаа болката, но и повикот за правда.

Маршот се реализира на вообичаената рута во Кочани, односно од Паркот на Револуцијата, низ Трговскиот центар до пред Општина Кочани, а оттаму кон Полициската станица, Основниот суд и Обвинителството во Кочани.