Малолетник од Скопје заврши на дежурен откако испил голема количина енергетски пијалоци
Седумнаесетгодишно момче од Скопје завршило на дежурен лекар откако испило голема количина енергетски пијалоци, објави Канал 5.
Лекарите предупредуваат дека кај младите сè почесто се забележува тренд на претерано консумирање вакви пијалоци богати со кофеин, кои често се користат за одржување будност и дополнителна енергија.
Професорот по токсикологија, проф. д-р Андон Чибишев, за Канал 5 изјави дека внесот на енергетски пијалоци во големи количини може сериозно да го наруши здравјето.
„Со овие производи земени во голема количина може да се предизвика висок притисок, а исто така влијаат и на нервниот систем. Може да предизвикаат еуфорично и несоодветно однесување што носи негативни последици“, изјави Чибишев.
Особено загрижувачки, нагласува тој, е што енергетските пијалоци стануваат дел од „забавата“ кај малолетниците, кои често ги комбинираат со алкохол.
Таквата комбинација, вели Чибишев, може да биде исклучително опасна.
