Мал раст во трговијата на мало со храна и горива во март

Во март годинава, според податоците на Државниот завод за статистика (ДЗС), прометот во трговијата на мало со храна, пијалаци и тутун е зголемен за 1,3 проценти, додека во трговијата на мало со автомобилски горива е забележан раст од 0,4 проценти во споредба со истиот месец лани.

– Во трговијата на мало во март 2025 година, во споредба со март 2024 година, гледано по групи и класи, стапката на прометот во групите: Трговија на мало со храна, пијалаци и тутун номинално е зголемена за 4,3 проценти, а реално за 1,3 проценти, Трговија на мало со непрехранбени продукти, освен гориво е зголемена номинално за 0,9 проценти, а реално опаѓа за 2,3 проценти, Трговија на мало, освен трговија со горива номинално е зголемена за 2,6 проценти, а реално опаѓа за 0,5 проценти и Трговија на мало со автомобилски горива е зголемена реално за 0,4 проценти, а номинално опаѓа за 6,5 проценти, информира ДЗС.