„Макстил“ го исчисти долгот, ќе видат ли дивиденда над 5.000 домашни акционери?
„Макстил“ во период од три години, целосно раздолжи над 27 милиони евра кај најголемиот доверител кој воедно е и мнозински акционер во скопската челичарница. Сега веќе се создаваат предуслови дел од добивката во форма на дивиденда да дојде и кај акционерите. Ако биде така „Макстил“ ќе направи сефте и за прв пат, во последните петнаесетина години, ќе подели дивиденда за своите акционери
Скопската челичарница „Макстил“ во целост го отплати својот долг кон „Дуферко Скоп СА“. Со оваа деловна трансакција „Макстил“ ја исчисти својата обврска кон оваа компанија во вкупна вредност од 27,4 милиони евра, објави компанијата на веб страницата на Македонската берза за хартии од вредност.
Според соопштението на берзата, достапно на следниот линк https://www.seinet.com.mk/Default.aspx?lang=MK&docID=66123, „Макстил“ во последната транша од исплатата ликвидирал обврска од 5,66 милиони евра. Во тој износ е вклучена и каматата по долгот која изнесува 291.906 евра. Со вкупниот износ „Макстил“ ги исплатил двете последни годишни рати кои се однесуваат за годинава и за минатата година.
Својот долг „Макстил“ го исплаќаше и во претходните две години. Договорот со најголемиот поединечен акционер „Дуферко Скоп СА“ бил склучен во 2021 година и предвидувал исплата на долг настанат во периодот на приватизацијата на поранешниот металуршки гигант „Рудници и железарница Скопје“.
При тоа договорот предвидувал дисконт (попуст н.з.) за секоја предвремена отплата на долг и безкаматен период на долг вратен до крајот на 2021 година. Во период од почетокот на 2022 година до сега каматата на главницата изнесувала 12 месечен ЛИБОР +2%.
Оваа е позитивна вест за инвеститорите во акции, а особено за трејдерите (најчесто физички лица чија стратегија е на кратки рокови да направат капитални добивки од вложување и продажба н.з.). И тука во прилог на тезата дека веста е позитивна и може да ја зголеми пазарната цена на акција има два аргументи.
Првиoт е тоа што најголемиот акционер во изминатиов период во неколку наврати купуваше мали количества акции од „Макстил“. Другата и веројатно поопилива причина за позитивен очекуван набој е во тоа што „Макстил“ по исплатата на долгот веќе има причина плус да исплати дивиденда , секако доколку има објективни околности за тоа.
Официјалните финансиски податоци за финансиското работење на „Макстил“ покажуваат дека компанијата е во добивка од работењето во првите девет месеци во 2023 година. Нето профитот изнесува 2,78 милиони евра. Во споредба со истиот период лани профитот е значително понизок, но тоа е очекувано и доколку се има во предвид и значајното намалување на приходите од продажба лани во однос на истиот период во 2022 година. За првите девет месеци 2023 година оперативната добивка изнесува 4,62 милиони евра, а приходите биле 100 милиони евра.
Според достапни корпоративни податоци „Макстил“ досега не исплаќал дивиденда на своите акционери, барем не во последните 15 години.
Доминантен акционер во „Макстил“ е „Дуферко Скоп СА“ компанија која поседува 83,2 отсто од акциите со право на глас. „Макстил“ има над 5.000 акционери – домашни физички лица кои поседуваат 15,4 отсто од акциите.
Р.Ф.
