Mаксим Димитриевски пак ќе се кандидира за градоначалник на Куманово
Претседателот на Движењето ЗНАМ и актуелен градоначалник на Куманово, Максим Димитриевски, ќе се кандидира за уште еден мандат на локалните избори, потврди денеска претседавачот на Централниот одбор на партијата, Игор Филков.
На прес-конференција, Филков изјави дека ЗНАМ активно преговара со коалицискиот партнер ВМРО-ДПМНЕ за заеднички настап на локалните избори, но дека некои одлуки се веќе донесени.
„Во моментов преговорите се во тек. Но, она што можам со сигурност да го потврдам е дека ќе имаме кандидат за градоначалник во Куманово, и тоа ќе биде нашиот претседател Максим Димитриевски,“ изјави Филков.
Тој додаде дека ЗНАМ ќе настапи со кандидати и во други општини низ државата, меѓу кои и најмалку една општина во Скопје, но преговорите за тоа сѐ уште траат.
Одговарајќи на прашање за можниот изборен модел, Филков порача дека партијата е подготвена за избори во секој момент и под било какви услови.
„Ние како ЗНАМ сме подготвени уште утре да има избори, со било каков модел. Со ова рапидно растење, со ова пристапување на нови членови и поддржувачи, можеме и в недела да излеземе на избори,“ рече Филков.
